Soekie Krog

Psalm 98:5 (sing ’n) Psalmsing tot eer van die HERE. Laat die see bruis en sy volheid, die wêreld en die wat daarin woon. Laat die riviere in die hande klap, die berge tesame jubel.

Die hele skepping van God maak geluide: wind, see, riviere, bome – alles gee aan God die eer. En ek wil Hom vandag eer vir al die interessantste diere en voëls en visse en plante wat Hy gemaak het met soveel kleure en verskeidenheid.

Alles het ‘n doel: Houtkapper het byvoorbeeld ‘n kort, harde bek om gate in bome te kap, suikerbekkie se snawel is lank en dun om nektar uit blomme te suig, eend se bek is plat om onder die water goggas of paddas te vang , maar het jy al gewonder: hoekom is die neushoringvoël se snawel so groot en krom?

Neushorings is pragtige voëls wat insekte én klien diertjies, soos akkedisse, vreet.

‘n Neushorings se bek is swaar, dis hoekom twee van sy nekwerwels aanmekaar vas is, sodat die nek hierdie swaar bek kan dra.

Hy maak ‘n diep trompet-geluid wat nog harder eggo binne-in sy hol snawel, veral by die bromvoël of boskraai, wat familie van die neushoring is.

Die rooibek en geelbek neushoring lyk amper dieselfde, behalwe die kleur van die snawel. Hulle broei in ‘n hol boomstam. Wanneer dit broeityd is, verveer die wyfie (sy verloor al haar vere). En, terwyl sy op die eiers sit, bou die mannetjie Neushoring haar toe met klei en los net ‘n groot genoeg gaatjie om met sy groot krom snawel vir haar en die kleintjies kos te voer. So beskerm die mannetjie sy familie teen ander roofdiere wat hulle kan skade doen. Wanneer hulle groot genoeg is om te vlieg, word die nessie weer oopgemaak, die vere het weer terug gegroei en die kleintjies is gereed om hulleself te beskerm.

Ons het ook God se beskerming nodig. God gebruik baie keer ander mense om ons te help beskerm. So ‘n wegsteek-oppas-storie lees ek in die Bybel, in 1 Konings 18:

Agab was ‘n wrede koning wat God nie gedien het nie. So ook sy vrou Isebel. Sy het op ‘n keer al die Profete van God probeer dood maak. In die koning se paleis het ‘n man gewerk wat God gevrees het, sy naam was Obadja. God het hom gebruik om een honderd profete weg te steek dat Agab en Isebel hulle nie kan kry nie. Hy het hulle in twee groepe van vyftig elk gedeel en in spelonke laat wegkruip. Hulle kon nie self uitkom om eet- en drinkgoed te kry nie en vir ‘n lang tyd het Obadja elke dag vir hulle lekker brood en water gebring om hulle aan die lewe te hou. Nadat die profeet Elia die groot oorwinning teen die Bal-profete behaal het, het hy ook gevlug vir die wrede Isebel. Toe hy by die spruit Krit sit en kla hy is die enigste profeet, het God hom herinner dat daar nog baie ander profete is. Was dit miskien omdat ‘n getroue man soos Obadja bereid was om hulle weg te steek en te beskerm?

Die Here leer ons dat ons vyand, die duiwel, rondloop soos ‘n brullende leeu om te kyk wie hy kan verslind. Sê dankie dat God mense gebruik om jou op te pas en weg te steek van gevaar - net soos die pappa-neushoringvoël. En wanneer pappa en mamma partykeer nee sê, is dit omdat hulle jou wil beskerm teen dinge wat hulle weet vir jou gevaarlik is en jou kan seermaak.

En onthou, God sê in Psalm 27:5: Want Hy steek my weg in sy hut in die dag van onheil; Hy verberg my in die skuilplek van sy tent.

Hier onder is 'n inkleurprentjie van 'n Neushoring-mannetjie wat sy kleintjies voer. Vra vir Pappa of Mamma om dit vir jou uit te druk sodat jy dit kan inkleur. (Regs-kliek op die prentjie en kliek op 'Print')

Padkos

7 - Die Kraai

Diere se geluide is die taal wat hulle praat. En God kan hulle almal hoor en verstaan.

Ek wens ek kon verstaan wat die voëltjies vir mekaar sê as hulle so mooi sing. Party voëltjies het net een wysie, maar baie ander voëls het verskillende voëltjie-woorde wat hulle praat.

‘n Kraai is 'n voël wat nie baie mooi kan sing nie, maar met sy hees, skor stem baie verskillende woorde of sinne kan praat. Hy klink anders as hy vlieg, bang is, kwaad is of verlief is. Kraai is een van die slimste soorte voëls. Hulle kan selfs mens-woorde aanleer en mens-gesigte herken. ‘n Raaf is ook deel van die kraai-familie. Die twee soorte kraaie wat omtrent oral in suid-Afrika voor kom, is die swart kraai en die witborskraai.

Het jy al die woord ‘kraaines’ gehoor? Mense praat van 'n kraaines as iets baie deurmekaar is. Dis omdat kraai se nes gebou is van allerhande goed dat dit lyk of hy gemors op gaar, tot plastieksakke!

‘n Kraaines word op n hoë platform gebou, sodat die kraai mooi kan uitkyk waarheen om te vlieg. Hy het 'n baie goeie sin vir rigting. Die seevaarders het altyd ’n kraai op een van hulle maste aangehou en dan die kraai laat vlieg as hulle verdwaal. Die kraai sal altyd die kortste pad land toe vlieg. Ons sê altyd ‘soos die kraai vlieg’. In die bybel word die kraai se navigasie gebruik as Noag ’n kraai eerste uit die ark stuur wat net gesweef het oor die water en toe weet hy daar is nie droë grond nie.

Kraaie is aas-diere (scavengers) wat beteken dat hulle feitlik enige iets sal eet: insekte, klein diertjies, soos paddas en muise, enige kos van mense, brood en vleis. Maar al is daar n klomp goed in hulle nes, is hulle nie suinige voëls nie. Toe die profeet Elia honger by die spruit Krit was, het God aan die kraaie bevel gegee om Elia daar te onderhou. En die kraaie het vir hom smôrens brood en vleis gebring, en saans brood en vleis, en hy het uit die spruit gedrink (1Kon 17:6). Dis darem wonderlik dat die kraai na God geluister het en deur God gebruik is om kos uit te deel wat hy eintlik self kon eet.

Vandag wil ek jou vertel van n onselfsugtige seuntjie wat deur God gestuur was om baie mense te help. Ons lees die storie in Markus 6:

’n Jong seun het van Jesus gehoor en hoe hy wonderwerke doen. Hy was juis naby die see van Galilea, toe hy ’n skare mense sien en vir Jesus daar saam met hulle, Jesus het al die siek mense gesond gemaak en hulle van God geleer. Dit het al begin laat word. Jesus se vriende, die dissipels het besef dat hulle nie naby winkels is om koste koop nie, ook het hulle nie genoeg geld gehad om 5000 mans plus hulle families kos te gee nie. Jesus het gesê hulle moet ’n plan maak. Die seuntjie kon kies of hy alleen aan sy lekker kos gaan eet en of hy dit gaan weg gee. Hy het dadelik sy vyf broodjies en twee visse aangebied, al is dit te min vir so baie mense. Hy sal daardie dag nooit vergeet nie. Jesus het die brood gevat, dit geseën en in stukke gebreek en begin uitdeel; so ook die vissies. Soos wat hy dit uitgedeel het, het dit net meer en meer geword, tot al die duisende mense genoeg geët het en nog stukke oorgebly het. Die seun het ook genoeg geëet. Hy het besef dat God hom daardie dag gestuur het om baie ander mense te help. Hy was so bly dat Hy kon sien hoe Jesus sy brode en vissies kon gebruik.

Is jy ’n opgaarder, of ’n uitdeler?

Ken jy God se stem? Sal jy ook, soos die kraai, direk kan gaan na die plek waarheen Hy jou stuur om vir ander mense te help?

2Kor 9:7  Laat elkeen gee soos hy hom in sy hart voorneem, nie met droefheid of uit dwang nie, want God het ’n blymoedige gewer lief.

Moenie vergeet om na God se Heilige Gees navigator te luister nie en wees bedag soos die kraai om te help waar jy kan.